Tala mai le EFKAS

Taunuu manuia le fa’apaiaina o le malumalu ‘UA TAUNUU’
Ianuari 18, 2019
Ua taunuu manuia le fa’amoemoe a le Ekalesia e pei ona alo atu ai i le fa’apaiaina o le malumalu UA TAUNUU.  E faafetaia ai le alofa ma le agalelei o le Atua i lona pule faasoifua i lana Ekalesia, ua taunuu manuia ai le faamoemoe.  O se vaaiga uiga ese sa molimauina i lea aso, i le soloa’i mai o le Ekalesia Aoao, aemaise o uso mai i atunuu e mamao na malaga mai i fonotaga a Komiti Tumau, ae tainane ai le mamalu o le ‘au valaaulia faapitoa, sa mafai ona mafuta mai ma fiafia faatasi i lea aso faamoemoeina.  Taga’i ane i le Lamepa Fa’apitoa Ianuari 2019, o loo avatu ai tala o taualumaga ma mea uma sa tutupu i lea aso fiafia.  E mafai foi ona e maimoa i le sauniga o le fa’apaiaina o le malumalu i luga o le itula a le Ekalesia i le upega tafailagi o le YouTube: (click here)

Ua le fa’ataunuuina le fa’atalanoaga mo le MSP4
Ianuari 17, 2019
Talu ai tapenaga sa feagai ai mo le fa’apaiaina o le malumalu, na le maua ai se avanoa e fa’ataunuuina ai le fa’atalanoaga o le MSP4 sa fuafua mo le aso 17 o Ianuari.  Sa ave le vai malu i puega i le mamalu o Komiti Tumau sa fono i lea vaiaso, faatasi ai ma le faatalosaga, afai o i ai se Komiti poo se ‘aulotu ua saunia se fa’atalosaga (proposal) e fia fa’atupe i alaga tupe ia mai le CWM, ona faaoo mai lea i le Ofisa a le Failautusi Aoao.  O loo ua galue nei le Ofisa a le Failautusi Aoao e tuu faatasia se talosaga tele e tuu atu i le CWM, ina ia mafai ona faamatuu mai ai alaga tupe ia mo le EFKAS ma ana porokalama fa’aolaolaina e fia faatino.  E iai le faamoemoe, a manuia le talosaga ma maua mai alaga tupe ia, ona toe fesootai atu lea ma faasilasila i ‘aulotu ma pulega, e faaulu mai a latou talosaga tusitusia mo ni porokalama fa’aolaola e fia fa’atupe i alaga tupe ia mai le CWM.

To’a-6 Toeaiina fou fa’aofi i totonu o le Komiti a le ‘Au Toeaina
Ianuari 16, 2019
O le amataga o le fonotaga a le ‘Au Toeaina na ofi ai Toeaiina fou e to’a-6 i totonu o le Komiti.  O ia latou nei:  o le susuga ia Tusi Seanoa, Faifeau Toeaina o le Pulega Ituau; o le susuga ia Lamese Faafili, Faifeau Toeaina o le Pulega Luanuu; o le susuga ia Logovii Polu, Faifeau Toeaina o le Pulega USO; o le susuga ia Niutunu Faiupu, Faifeau Toeaina o le Pulega Alaska i Saute; o le susuga ia Leatu’au Tauese, Tiakono Toeaina o le Matagaluega Amerika Matu i Sisifo; ma le susuga ia Vaeao Taliulu, Tiakono Toeaina o le Matagaluega i Alaska.

Saofaga a Pulega mo le Fa’apaiaina o le Malumalu
Ianuari 16, 2019
Ua mae’a le saofaga a Pulega sa feagai ai i le maota o Taeaofua o Tupulaga. E pei ona fa’ailoa atu i se taimi ua sola, o le finagalo lea a le Laulaufono a le Fonotele, le Komiti o Feau Eseese, ma le Komiti a le ‘Au Toeaina, ina i ai se fesoasoani a Pulega taitasi a le EFKAS mo le faamoemoe i le faapaiaina o le malumalu UA TAUNUU, aemaise i faaaloaloga mo le ‘au valaaulia.  E ta’i $2,000.00 Pulega uma (24).  A o Pulega i Amerika Samoa nei (10) sa fa’aopoopo ai ma sua e ta’i 7 a le Pulega.  E maoa’e foi le alofa o le Atua i lea afiafi i le molimauina o le sagisagi fiafia mai o Pulega i le taimi o le saofaga.  O le Lamepa Fa’apitoa Ianuari 2019 o loo ‘auiliili atu ai le saoga a Pulega taitasi sa fa’atino i lea afiafi.  A o le tuu aofaiga o le saofaga sa maua, e $47,500.00 le seleni sa mafai ona fa’amaopoopoina, ma sua e 75.  Faamalo faafetai i Pulega uma a le EFKAS i lou lagolagoina o le faamoemoe o le Ekalesia.

Fa’agasolo Fonotaga a Komiti Tumau 2019
Ianuari 15, 2019
Ua taunuu manuia mai i fanua le to’atele o sui o Komiti Tumau mo le amatalia o fonotaga, e pei ona aiaia i le Faavae o le Ekalesia.  Ua tulaga ese le to’atele o Komiti Tumau ua fono i lenei tausaga, e le gata ona o le tele o mataupu e manaomia ona soalaupule ai mo le galuega ma le misiona a le Ekalesia, a o le ‘auai mai foi i lenei tausaga, ina ia fiafia fa’atasi i le fa’apaiaina o le malumalu UA TAUNUU i le aso 18.  O le Komiti a le ‘Au Toeaina, Komiti o Feau Eseese, Komiti o Tupe, Komiti Fa’amisionare, ma le Komiti o Aoga; o Komiti Tumau ia ua faagasolo nei a latou fonotaga.  Pau le Mafutaga Tumaoti sa usia lo latou fonotaga i lea vaiaso, o le Mafutaga a le ‘Au Leoleo.

Fa’amanatu le 20 tausaga o le pa’aga a le UCC ma le EFKAS
Tesema 3, 2018
O le aso 30 o Novema ma le aso 1 o Tesema na fa’amanatuina ai le 20 tausaga o le faiga-pa’aga i le va o le UCC ma le EFKAS. O lenei fa’amoemoe sa fa’ataunuu i Honolulu, HI, ma sa tali malo fa’atasi ai le UCC Hawaii Conference i lalo o le ta’ita’iiga a le susuga i le Faifeau Foma’i ia Iese Tu’uao, ma le EFKAS Matagaluega Hawai i lalo o le ta’ita’iiga a susuga i Toeaiina ia Falelua Lafitaga ma Kalasa Afuola. Mai le itu o le UCC, sa ‘auai ai Rev. Dr. Karen Georgia Thompson (Minister for UCC Ecumenical and Faith Relations), Rev. Dr. James Moos (Executive Minister, UCC Wider Church Ministries), Rev. Diane Wiebl (UCC Conference Minister, Northern California Nevada Conference), Rev. Gabrielle Chavez (UCC Conference Minister, Hawaii Conference), Rev. Dr. Iese Tu’uao (United Samoan Ministries/Hawaii Conference), ma Rev. Sepulona Tanuvasa (United Samoan Ministries). Ua saunia se ripoti mae’ae’a o lenei fa’amoemoe i totonu o le Lamepa o Novema-Tesema 2018.

Komiti Tumau ma Mafutaga Tumaoti e usuia a latou fonotaga ia Ianuari 2019
Novema 11, 2018
Ua mae’a ona fesootai mai laulau ta’itasi a Komiti Tumau ma Mafutaga Tumaoti e fa’ailoa mai a latou fonotaga e fia faia i le masani o Ianuari 2019. O i latou nei ua o’o mai a latou fa’aaliga i le Ofisa a le Failautusi Aoao: o le Komiti a le ‘Au Toeaina, Komiti o Tupe, Komiti Fa’amisionare, Komiti o Aoga, o le Komiti o Feau Eseese, ma le Mafutaga a le ‘Au Leoleo. O le aso 15 ma le 16 o Ianuari ua fa’amoemoe e fa’ataunuu ai fonotaga a Komiti Tumau ma Mafutaga Tumaoti.

Mae’a le Fono Tele XI a Ekalesia So’o-Fa’atasi a le Pasefika (PCC)
Novema 3, 2018
Ua mae’a manuia le Fono Tele XI a Ekalesia So’o Fa’atasi a le Pasefika (Pacific Conference of Churches) sa usuia i Aukilani, Niu Sili ia Oketopa 26 e o’o atu i le aso 1 o Novema. O le susuga i le Ta’ita’ifono ia Fa’aeteete Saifoloi ma le faletua ia Mina, le susuga i le Toeaina ia Mafutaga Faaleaoga ma le faletua ia Laia, le susuga i le Sui Failautusi ia Ioelu Onesemo, ma le susuga i le A’oa’o Fesoasoani ia Manutafea I. Fano sa fai ma sui usufono a le EFKAS mo lea fa’amoemoe taua. Ua saunia e le susuga i le Toeaina ia Mafutaga Faaleaoga se ripoti mae’ae’a o mea uma sa faia i lenei fonotaga, e mafai ona e faitau ai i le Lamepa o Novema-Tesema 2018.

Fa’amaonia le Porokalama mo le Fa’apaiaina o le Malumalu “Ua Taunuu”
Oketopa 9, 2018
Ua mae’a nei ona fa’amaonia e le Komiti o Tama a le Ekalesia le porokalama sa tu’uina atu e le Komiti o Feau Eseese ma le Laulaufono a le Ekalesia mo le fa’apaiaina o le malumalu “Ua Taunuu.” O Ianuari 18, 2019, o le aso lea ua fa’atulaga e fa’ataunuu ai le fa’amoemoe, e taualuga ai le vaiaso o le fonotaga a Komiti lea e amata i le aso 14 o Ianuari. Ua talia e le ‘au Toeaina le tulaga o vala’aulia mo lea fa’amoemoe (fa’auluuluga o le faigamalo a Amerika Samoa ma nisi o ulu o matagaluega, fa’auluuluga o Ekalesia So’o-Faatasi i Amerika Samoa, Ta’ita’ifono EFKS, o sui mai le UCC, fa’apea ma le konekarate sa feagai ma le galuega, o le Paramount Builders). O le Mafutaga Aoao a Tina ua taoto atu ai le tulaga o taumafataga. A o le mamalu o nofo a pulega, ua taoto atu ai le tulaga o saoga mo le fa’atinoina o lenei fa’amoemoe. O se taimi o i uma e tu’uina atu ai le tusi aloa’ia i susuga i Toeaiina ma le mamalu o nofo a pulega a le EFKAS, e fa’ailoa atu ai tulaga o lenei saoga. E i ai foi tusitusiga i totonu o le Lamepa o Setema-Oketopa 2018 o loo fa’amatala atu ai.

Fa’ataoto le Porokalama mo le Fa’apaiaina o le Malumalu “Ua Taunuu”
Oketopa 3, 2018
Sa faia le fonotaga a le Komiti o Feau Eseese ma le Laulaufono a le Ekalesia e fa’ataoto ai se porokalama mo le fa’apaiaina o le galuega o le malumalu “Ua Taunuu.” O loo gasolosolo lelei le tulaga o le galuega e pei ona i ai nei, ma ua i ai le fa’amoemoe, o le masina o Tesema 2018 o le a mae’a ai. Ae ua finagalo le Komiti o Feau Eseese ma le Laulaufono a le Ekalesia, e lelei ona tu’u atu le fa’apaiaina o le galuega i le taimi e usuia ai le fono a Komiti ia Ianuari, ina ia mafai ona ‘auai mai totino a le EFKAS o loo papa ‘aao i atunuu i fafo, mo lea fa’amoemoe taua. O le aso 18 o Ianuari 2019 ua fuafua e fa’ataunuuina ai lea fa’amoemoe. O le tulaga o valaaulia, ua finagalo le Komiti ma le Laulaufono e valaaulia fa’auluuluga o le faigamalo a Amerika Samoa, fa’atasi ai ma fa’auluuluga o Ekalesia So’o-Fa’atasi. O tapenaga uma ia ma le porokalama mo le fa’apaiaina o le galuega, ua fa’amoemoe e tu’uina atu i le Komiti a le ‘Au Toeaina e fa’amaonia ai, ona fa’alauiloa aloa’ia lea i le mamalu o le Ekalesia Aoao.

Fonotaga mo le MSP4
Setema 24, 2018
E fa’amanatu atu le fonotaga mo le MSP4 lea sa pasia i le Fono Tele XXXII ua mavae atu, e faia i le taimi o fonotaga a Komiti ia Ianuari 2019. O lea fonotaga o le a talanoaina ma fa’atulaga ai ni porokalama e mafai ona fa’atupe e le MSP4, le alaga tupe lea mai le CWM mo le fa’aleleia o misiona ma galuega tala’i a Ekalesia o loo latou fai pa’aga, e pei o le EFKAS. O le aso 17 o Ianuari 2019, le vaiaso lea o loo fa’agasolo ai le fonotaga a Komiti, ua fa’amoemoe o le a fa’atino ai lenei fonotaga. O totino ua fa’atulaga e ‘auai i lea fonotaga: e to’a-2 sui mai i Komiti Tumau ma Mafutaga tumaoti uma.

Tolopo le a’e o le High School ma le Elementary i Kanana Fou
Aukuso 31, 2018
Ua tolopo nei le a’e o Kanana Fou Elementary ma Kanana Fou High School ona o galuega o loo gasolo nei mo le fa’aleleia o faleaoga. O lea ua tu’u ai i tua le a’e o aoga i le aso 10 o Setema. O loo galulue nei le Ofisa o le Mafutaga Aoao a Tina mo le fa’aleleia o le Elementary. A o le Ta’ita’i o le Komiti o Aoga, le Pule Aoga ma faiaoga a le High School, le Ofisa o Aoaoga Kerisiano, fa’atasi ai ma le Ofisa Tutotonu; o loo galulue mo le fa’aleleia o le High School. E le faigofie le galuega i le High School. E tele mea e manaomia ona fa’aleleia, ae utiuti le seleni fa’asoasoa e fa’atino ai. Peitai, o loo gasolo lelei pea le galuega o le fa’aleleia o le High School ona o le fesoasoani malosi mai o le Komiti Feau Eseese, le afioga i le Ta’ita’i ia Le’i ma le mamalu o le komiti. Faafetai tele.

Talia e le CWM tala fa’aletupe o le MSP2
Aukuso 29, 2018
Ua talia nei e le CWM le tala fa’aletupe o le MSP2 a le EFKAS, lea sa tuuina atu ina ua mae’a le Fono Tele XXXII. Ona o lea, ua mafai ona toe agavaa le EFKAS i alaga tupe mai le CWM, ua fa’agaga mo le fa’aleleia ma le fa’amausali atili o galuega tala’i ma misiona a Ekalesia Kerisiano o loo latou fai pa’aga fa’atasi, e aofia ai ma le EFKAS. O le tala fa’aletupe o le MSP2, o se fa’amoemoe ua leva ona taumafai ai le Ofisa Tutotonu i le tuana’i. A o lea ua tafa le finagalo a le CWM ma ua talia le tala sa mafai ona tu’uina atu i le fa’aiuga o le masina o Iulai, lea ua toe tatala mai ai le avanoa mo le EFKAS i alaga tupe o le MSP2, fa’atasi ai ma le MSP3 ma le MSP4. O loo galue nei le Ofisa a le Failautusi Aoao e tuu faatasi ni “proposals” e tali ai manaoga a le Ekalesia Aoao sa fa’aleo i nisi o fono tele ua mavae atu, fa’atasi ai ma talosaga sa tu’uina mai e Matagaluega ma le nofo a Komiti, mo ia alaga tupe mai le CWM.

Misionare fou a le EFKAS
Aukuso 15, 2018
Ua sauni le Komiti Fa’amisionare e momoli nisi o tama fanau a le Ekalesia ua filifilia mo le galuega fa’amisionare i atunuu e mamao, e pei ona fa’amaonia i le Fono Tele XXXII ua mavae atu. O le susuga i le faifeau misionare ia Peter Fualaau ma le faletua ia Ruta o le a galulue i la’ua i le ‘aulotu i Antioch, CA. O le susuga i le faifeau misionare ia Felise Augafa ma le faletua ia Avataeao o le a galulue i le ‘aulotu i El Paso, TX. O le susuga ia Apisaloma Toleafoa ma le faletua ia Lora, o le a galulue i le galuega fou i DMV i Virginia. A o le susuga i le faifeau ia Oto Tumanu ma le faletua ia Rebecca, o i la’ua o le a galulue i le isi galuega fou i Sydney, Ausetalia. O i latou uma ia ua fa’amoemoe lau Komiti Faamisionare e momoli aloa’ia i le masina o Setema.

Toe amatalia galuega i le Malumalu “Ua Taunu’u”
Aukuso 7, 2018
Ua mae’a ona sainia ma toe fa’afou le feagaiga ma le vaega o le Paramount Builders, e toe fa’aauau le galuega i le malumalu “Ua Taunuu.” O le aso 6 o Aukuso lea sa toe amatalia ai galuega, talu ona taofia mai i le masina o Iulai ona o le Fono Tele XXXII sa usuia i le laumua i Kanana Fou. Ina ua amata le galuega i le masina o Fepuari 2018 i lalo o le ta’ita’iga a le Ta’ita’ifono ia Eveni Mamoe, sa iai le fa’amoemoe e mae’a i le masina o Iulai ma fa’aaoga ai le malumalu mo le fono tele. Peita’i, ua le o gatasi le futia ma le umele, ma na taofia ai lea o le galuega, ae usuia le fono tele a le Ekalesia Aoao i le Fale o le Mafutaga Aoao a Tina. A o lea ua mae’a ona fa’afou le konekarate ma le Paramount, ma ua toe fa’agasolo ai nei galuega o le malumalu. Ua iai le fa’amoemoe i le Ta’ita’ifono ia Faaeteete Saifoloi ma le laulau, o le a le toe fa’anatinatia le galuega e pei ona iai, ae o le a faifai lemu ma fai ia mae’a lelei, e fa’atatau lona umusaga i le masina o Ianuari 2019, i le taimi masani o fonotaga a Komiti tumau.

Filifilia Talauega Eleasalo Ale e fai ma Loia Fautua a le EFKAS
Iulai 30, 2018
E tusa ai ma ala o le Faavae a le Ekalesia Aoao (XI, 10), ua filifilia e lau Laulaufono le afioga i le Tiakono ia Talauega Eleasalo Ale e fai ma Loia Fautua a le Ekalesia, mo le tausaga 2018-2022. Ua filifilia Ale ina ua finagalo le Fono Tele XXXII, e fa’amalolo le afioga ia Afoa Moega Lutu mai le tofiga, ona o gasegase o le tino e pei ona feagai ai. Sa manatu alofa le Fono Tele XXXII ma le Komiti a Tama o le Ekalesia, ina ua maua tala o loo saili matagi le Afioga i le Aloalii i atunuu e mamao, ona o gasegase sa aafia ai. O lea na fai ai loa le finagalo a le Fono Tele XXXII, e fa’amama avega i lea auauna ua iloa lona tautua i le Ekalesia Aoao, ma fa’agafua mai le tofi Loia Sili. E momoli atu ai le faafetai tele i le afioga ia Afoa i le tele o tausaga sa galue ai, ma le tele o galuega lelei sa ia faia mo le Ekalesia e ala i le tofi o le Loia Fautua. O le tatalo a le EFKAS, ia agalelei le Atua i le auauna. Ia galue Lona mana fa’amalolo, e fa’afoisia le malosi o Lana auauna.